I løpet av dei neste åra skal den franske nybølgeregissøren Jean-Luc Godard vere kinoklar med to ny filmar. Neste år er han ferdig med den eksperimentelle kunstfilmen ”Socialisme”, og etterpå skal han gå laus på Holocaust-boka ”The Lost: A Search for Six of Six Million” av Daniel Mendelsohn.

”Socialisme” er ein film som står i stil med den eksperimentelle forma Godard har utforska dei seinare åra – i alle fall om me skal tru traileren. Eit litt utradisjonelt val er at Godard har plukka ut den amerikanske punkrockstjerna Patti Smith til ei av rollene.

Her er traileren til ”Socialisme”:

Boka ”The Lost: A Search for Six of Six Million”, som Godard skal adaptere, er ein sjølvbiografi av Daniel Mendelsohn. Fleire av familiemedlemma hans vart drepne under Holocaust, og boka handlar om at han prøver å spore opp lagnaden dei møtte.

Dette vil vere den fyrste gongen Godard lagar ein film som handlar direkte om Holocaust. Han har tidlegare vori innom temaet så vidt i antikrigsfilmen ”Les carabiniers” (1963), ”Le petit soldat” (1963), kunstfilmen ”Éloge de l'amour” (2001) og episodefilmen ”Notre musique” (2004), men aldri før har filmane hans konsentrert seg såpass mykje om Holocaust som ”The Lost” vil gjere.

Sjølv om den franske meisteren får ufortent lite merksemd rundt dei nyare filmane sine, er det godt å sjå at han framleis held koken når han nærmar seg 80 år.